МӘЖІЛІС ДЕПУТАТТАРЫ ҚҰРЫЛЫС НЫСАНДАРЫНДА БОЛДЫ
Аймақта кездесулер өткізіп жүрген ҚР Парламенті Мәжілісінің депутаттары А.Ералиев пен Г.Шиповских облыс орталығындағы сол жағалаудағы құрылыс пен Жаппасбай батыр көшесі бойындағы тұрғын үйлерде болды.
Депутаттар сол жағалауда жоспарға сай 9,8 гектар аумаққа түсетін тұрғын үйлер орамындағы құрылыс жұмыстарын көрді. Жеке инвесторлар қаражаты есебінен салынып жатқан 778 пәтерлі 18 тұрғын үй мен 320 орындық балабақшадағы құрылыс жұмыстарымен танысты.
Осы күні мәжіліс депутаттары Жаппасбай батыр көшесі бойындағы жаңадан бой көтеріп келе жатқан шағын ауданды аралады. Халық қалаулылары құрылысқа отандық өнімдерді пайдалану жайын баса айтты.
Сонымен қатар, жұмысқа жергілікті азаматтарды көбірек тартуға назар аудару қажеттігін атап өтті.
