АЛПЫС БЕС АДАМ ЖҰМЫСҚА ЖОЛДАМА АЛДЫ
Бүгін «Нұр Отан» партиясы Қызылорда қалалық филиалының ұйымдастыруымен Қызылорда қаласы жұмыспен қамту және әлеуметтік бағдарламалар бөлімінде «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы" аясында бос жұмыс орындары жәрмеңкесі өткізілді. Шарада «Нұр Отан» партиясы Қызылорда қалалық филиалы төрағасының бірінші орынбасары Ш.Әбдірахманов, қалалық жұмыспен қамту бөлімінің қызметкерлері, қалалық мәслихат депутаттары ашық диалог аясында халықты жұмыспен қамту, жаңа жұмыс орындарын ашу бағытында пікір алмасты.
–Бүгінгі бос жұмыс орындары жәрмеңкесіне 22 мекеме мен 88 адам қатысты, оның 65-і жаңа жұмыс орнына жолдама алды. Жалпы жыл басынан бері мұндай шара 12 мәрте өткізіліп, нәтижесінде 1245 адам тұрақты жұмысқа орналасты, - дейді қалалық жұмыспен қамту бөлімінің меңгерушісі Ақмарал Жүсіпова.
