ҚАЛАНЫ ЛАСТАҒАНДАР ҚОМАҚТЫ АЙЫППҰЛ ТӨЛЕЙДІ
Қоғамдық тазалықты сақтап, өзегінің еңбегіне сыйластықпен қарау әрбір азаматтың парызы. Кез келген заң бұзушылықтың барлығы ұсақ тәртіпсіздіктерден басталатынын ескерсек, көшені ластағандар жазасыз қалмауы тиіс. Құқық қорғау саласының қызметкерлері осы бағыттағы тәртіпсіздіктермен күрес жұмыстарын қарқынды түрде жалғастыруда, деп хабарлайды облыстық ішкі істер департаментінің баспасөз қызметі. Осы жылғы 4 шілдеде полиция қызметкерлері үйінен шығарылған қоқысты қала орталығындағы арықтардың біріне тастай салған қала тұрғынын байқайды. Оған қатысты Қазақстан Республикасы Әкімшілік құқық бұзушылық туралы кодексінің 434-бабы негізінде әкімшілік хаттама толтырылып, материалдар сотқа жолданды.
Дәл осы күні бейнебақылау камераларының назарына әңгіме-дүкен құрып отырған 4 азаматтың құқық бұзушылық әрекеті түседі. Олар тұрғындардың ортақ пайдаланатын орнына шемішкі шағып, темекі қалдығын тастаған. Тәртіп бұзушыларға қатысты ҚР Әкімшілік құқық бұзушылық туралы кодексінің 434-бабына сай әкімшілік шара көрілді.
Айналаны ластаушылардың кінәсі дәлелденсе, оларға 10 айлық есептік көрсеткіш мөлшерінде айыппұл салынады немесе он тәулікке дейінгі мерзімге әкімшілік қамаққа алынады.
