ӨЗЕКТІ МӘСЕЛЕЛЕРДІҢ ШЕШІМІ ОРТАҚ
Қазақстан мен Ресей Байқоңыр қаласының инфрақұрылымын дамытып, коммуналдық шаруашылықты жаңғырту және тұрғындардың әлеуметтік проблемаларын шешуді көздейтін бірлескен бағдарламаны жыл аяғына дейін қабылдайды, деп хабарлайды Қазақстан Республикасы Президентінің «Байқоңыр» кешеніндегі арнаулы өкілінің қызметін қамтамасыз ету басқармасының мамандары. Басқарма өкілдерінің дерегінше өткен айда Қазақстан-Ресей үкіметаралық комиссиясының 5-ші отырысына орай РФ Үкіметі төрағасының орынбасары Д. Рогозиннің сапары аясында Байқоңыр қаласын дамыту бағдарламаларын қаржыландыру механизмі де келісілген.
Комиссия отырысында зенит-зымыран кешендері мен дүркіндете атудың реактивтік жүйелерін жаңғырту, Ми-35 тікұшақтарының ірі құрылғыларын құрастыру, пилотсыз ұшу аппараттарын бірлесе өндіру, майдан авиациясы және кең көлемдегі тікұшақ техникасын жөндеу мен қызмет көрсету бойынша өңірлік авиациялық орталықтар құру бағытында уағдаластықтарға қол жеткізілді.
Сондай-ақ, энергетика және халық шаруашылығының қажеттіліктері үшін қуаттылығы 2-ден 20 МВт-қа дейінгі газтурбиналық генераторларды өндіру және әскери авиация қозғалтқыштарын жөндеу бойынша орталық құру мәселесі айтылды.
