БИЫЛ ЖАҢАҚОРҒАН АУДАНЫНДА 6 МЕКТЕП САЛЫНАДЫ
«Нұрлы жол» бағдарламасы аясында биыл Жаңақорған ауданында 6 мектеп салынады. Жалпы Қазақстан бойынша бағдарламаға орай 56 мектеп бой көтереді деп күтілсе, соның алтауы осы осы ауданда салынбақ.
Облыстық білім басқармасы мамандарының дерегінше бұл Жаңақорған кентіндегі №56, Қожамберді ауылдық округіндегі №162, Аққорғандағы №256, Аққұм стансасындағы №221, М.Нәлібаев ауылындағы №196 және Төменарық елдімекеніндегі №223 мектептер.
Қожамберді, Аққорған, М.Нәлібаев және Аққұм ауылдарындағы білім ошақтары 2000 жылдардың басында асар әдісімен салынған-ды. Ал Жаңақорған кенті мен Төменарықтағы мектеп құрылысы кеңестік кезеңде қаланған.
Білім ошақтары арасында Төменарықтағы мектептің тарихы тым әріде жатыр. Алғаш сонау 1939 жылы 24-теміржол разъезі балалары үшін ашылған мектеп 1970 жылдары Төменарық ауылына көшіп келіпті. Сегіз жылдан кейін онжылдық орта мектеп мәртебесін иеленген білім ошағында бүгінде жылына 400 оқушы білім алады.
Өткен жылы қарашада жұмысын бастаған «СМП-Қызылорда» ЖШС қазір мектеп құрылысын толық аяқтады. Енді нысанға жаңа жабдықтар мен компьютерлер жеткізіледі.
