НЫСАНДАР ЖОБАЛАРЫ ӨЗ МЕРЗІМІНДЕ ӘЗІРЛЕНУДЕ
Осы жылдың екінші тоқсанында облыстық құрылыс, сәулет және қала құрылысы басқармасы арқылы Шиелі ауданы Жөлек ауылындағы дәрігерлік амбулатория, Шиелі кентіндегі 150 төсектік орталық аудандық аурухана, Қазалы қаласындағы 250 орындық емхана, Қызылорда қаласындағы облыстық онкология аурухана, Ақсай полиция бөлімшесі, Қазақ орталық атқару Комитетінің ғимараты құрылысының жоба-сметалық құжаттамаларын әзірлеуге мемлекеттік сатып алу конкурсы жарияланды. Басқарма мамандарының айтуынша бүгінде жоба-сметалық құжаттамалары әзірленген білім, спорт, мәдениет салалары бойынша 21 нысанның жобалары өз кезегін күтуде. Аталған нысандарды мемлекеттік-жеке меншік әріптестік аясында жүзеге асыру шаралары да қарастырылып отыр.
Сондай-ақ «Қызылорда қаласы СПМК-70 ауданындағы 200 орындық жатақханасы бар 600 орынға арналған кәсіптік-техникалық лицей құрылысы» нысанының жоба-сметалық құжаты әзірленіп 2017 жылдың 19 сәуірінде «Фрост-КZ» ЖШС-нен (жеке аккредиттелген сараптама) № ФРОСТ-0039/17 сараптама қорытындысы алынды.
Тиісті мекемелермен бірлесіп жобалау жұмыстарына дейін әзірленетін жоба-алды құжаттары өз мерзімінде жинақталып, сәулет жоспарлау тапсырмасына (СЖТ) сәйкес жоба-сметалық құжаттардың әзірленуі қадағалануда.
