ҚАЛА ӘКІМДІГІ БАҚ ӨКІЛДЕРІН ҚҰТТЫҚТАДЫ
Бүгін Қызылорда қаласының әкімдігі Қорқыт ата атындағы ҚМУ-дің Студенттер сарайында «Ұшқыр қалам – 2017» атты шара ұйымдастырып, онда республикалық және жергілікті БАҚ өкілдерін мерекелерімен құттықтады.
Кездесуде қала әкімінің міндетін атқарушы А.Шәменов мерекеге орай құттықтауын жеткізіп, қалам иелеріне деген құрметін танытты. Қала әкімінің орынбасары Ш. Байманов та журналистерге лебіз арнады.
Шарада республикалық «Қазақпарат» ақпарат агенттігінің облыстағы меншікті тілшісі Елубай Әуезов пен «Қызылорда-ньюс» интернет-газетінің бас редакторы Мұрат Жетпісбаевқа Қызылорда қаласының Құрмет грамотасы табыс етілді. Республикалық, жергілікті БАҚ өкілдері де түрлі номинацияларға орай марапатқа ие болды.
Республикалық «Егемен Қазақстан» газетінің меншікті тілшісі Ержан Байтілес, «Ақпарат кз» газетінің бас редакторы Б. Алпысбаева әріптестері атынан атқарушы биліктің алғаусыз құрметіне алғыстарын жеткізді.
