Kyzylorda-News.kz

   Қазір білімді сарапқа салатын басты сынақ – ұлттық бірыңғай тестілеу. Биыл осы сынаққа өзгерістер енгізілгені де белгілі. Жаңа нәрсе қай кезде де тосын, өзіндік қиындығы болары сөзсіз. Дегенмен білімді жасқа қандай да бір қиындық тосқауыл болмасы анық.

  Жыл сайын  ҰБТ-да облыс көлемінде өз білімдерін жоғары деңгейде дәлелдеп жүрген  №10 дарынды балаларға арналған облыстық «Білім-инновация» лицейінің бітіруші түлектері биыл да сенім үдесінен шықты.

  Лицей түлегі Айзат Русланқызы ҰБТ-да 136 ұпай жинады. Айзат – «Алтын белгі» иегері және Президенттік олимпиада жүлдегері. Оқушымыздың жоғары ұпай жинайтынына сеніміміз мол болған еді. Себебі әр сабағына тыңғылықты дайындалып, үнемі білімін жетілдіріп, ізденіс үстінде жүретін шәкіртіміз байқау сынақтарында да 137-139 ұпай аралығында көрсеткіш көрсетіп жүрді.

  Сонымен қатар ол халықаралық деңгейдегі IELTS емтиханынан 7 балл жинап, Назарбаев университетіне түсу емтиханын тапсырып та қойды. Қазір университетке құжат дайындауда. Айзаттың болашақта білімді де білікті маман болатынына біз сенеміз!

  Сол секілді Әйгерім Ермекбай (127 балл), Жансая Төребаева (125), Жанбота Жұмабек (122), Әйгерім Сағидолла (122) сынды оқушыларымыз да жоғары деңгейдегі білім көрсеткішін көрсетіп, лицейіміздің абыройын асқақтатуға өз үлестерін қосты. Жалпы ҰБТ-ға кірген 38 түлектің 27-сі 100-ден жоғары балл жинады.