ЖАЙЫЛМАНЫҢ ҚАРБЫЗЫ ПІСТІ
Жаңақорған ауданындағы Жайылма елдімекенінде қарбыз пісіп, жер емген ағайын үшін қауырт шаруа басталды. Кеше осыған орай аудан әкімі Ғалым Әміреев арнайы соғып, диқандар қауымының қуанышын бөлісті. Аудан орталығынан ашылатын «Мейірім» коммуналдық базарына өнім жеткізу жөнінде шаруалармен кеңес құрды.Аудан әкімшілігінің бастамасымен 25 маусымда ашылатын «Мейірім» базары ауыл тұрғындарының ауласында өскен көкөнісі мен жеміс-жидегін сатуға арналып отыр. Және сауда қатарлары тегін беріледі. Басты талап – мұндағы өнім бағасының базар құнынан төмен болуы қажет. Осы мақсатта жергілікті билік Қостанайдан «Цесна» ұнын тікелей алдырып отыр. Базардағы бағасы 5 мың теңгеден асатын бұл ұн «Мейірімде» 4500 теңгеге саудаланады. Ең бастысы осы базарда Жайылманың қарбызы да арзан бағада сатылады.
Аудан әкімдігінің жергілікті брендке айналып үлгірген өнімді насихаттау барысындағы бастамасына орай Жайылманың қарбызы Астана, Ақтөбе, Қостанай қалаларында да сатылатын болды. Аудан басшылығы тиісті орындармен осы шаһарлар базарларында жаңақорғандық өнімге арнайы орын белгілеу жөнінде келісім жасасты.
