МАМАНДАР ВЕЛОШЕРУГЕ ШЫҚТЫ
Қызылорда қаласында облыстық төтенше жағдайлар департаменті мен әділет департаменті мамандары қатысқан велошеру өтті. Ол Тәуелсіздік даңғылынан басталып, Евразия спорт кешені арқылы Желтоқсан көшесіне түсіп, орталық алаңдағы мәреден аяқталды. Сайыс өз деңгейінде өтті. 8 шақырым жолда велоспортшылар бар күш-жігерін салды. Жарысқа қатысқандар арасында жастардың көбеюі велоспортқа деген ел қызығушылығын танытқандай болды. Бұқаралық спорт түрлерін дамыту және салауатты өмір салтын насихаттау бағытында ұйымдастырылған бұл сайысты алда әуесқойлар арасында өткізу жоспарланып отыр.
