ҚЫЗЫЛОРДАДА ДЕМАЛЫС КҮНДЕРІ 2 АДАМ СУҒА КЕТКЕН
Өткен демалыс күндері қаладағы «Жаңадария» каналында қайғылы жағдай орын алды. Онда 21 және 23 жасар екі азамат суға батқан. ММ «ОӨАЖҚЖ» күштері 17 сағатта мәйіттерді судан шығарып алды. Бұл туралы бүгін Өңірлік коммуникациялар қызметінде өткен баспасөз мәслихатында белгілі болды. Мамандардың айтуынша жыл басынан бері Қызылорда 9 адам тілсіз жаудың құрбаны болып отыр, оның үшеуі бала. Бұл өткен жылдың осы уақытымен салыстырғанда 5 адамға кем.
- Қызылорда облыстық төтенше жағдайлар департаментінің мамандары қайғылы жағдайлардың алдын алу және олардың салдарын жою судағы қауіпсіздік бойынша үгіт-насихат жұмыстарын жүргізуде. Жасақ құтқарушылары да жыл басынан бері судағы және мұздағы қауіпсіздікті қамтамасыз ету бойынша бірқатар жұмыстар атқарды. Десек те тұрғындардың салғырттығы қайғылы жағдайға әкеліп соқтырып отыр, - дейді облыстық ТЖД төтенше жағдайларды жою бөлімінің басшысы Бақтияр Тұрманов.
Мамандардың айтуынша, үлкендердің суға кетуінің себебі - қауіпсіздік ережелерін ескермеуі, мас күйінде суға шомылу. Ал балалардың суға кетуі көп ретте ата-ананың қарауынсыз қалғаннан болып отыр дейді мамандар.
