«STOP-ТРАФИК» БАРЫСЫНДА 5 ҚЫЛМЫСТЫҚ ІС ҚОЗҒАЛДЫ
12-14 маусым аралығында Қызылорда облысы аумағында адам саудасына байланысты қылмыстарды ашу, ескерту, жолын кесу және еңбегін қанау мақсатымен адамдарды ұрлау және бас бостандығынан айыру бағытындағы қылмыстарды анықтау мақсатында «STOP трафик» жедел-профилактикалық іс-шарасы жүргізілген болатын. Үш күнге созылған шара барысында полиция қызметкерлері рейдтік жұмыстар жүргізіп, 5 қылмыстың беті ашылса, қоғамдық орындарда тиісу және үй-жай ұсыну дерегі бойынша 16 азаматқа әкімшілік шара көрілді. Мәселен, 13 маусымда Ұйымдасқан қылмысқа қарсы күрес басқармасы қызметкерлерімен жүргізілген жедел іс-шаралар барысында қала орталығындағы сауналардың бірінде жеңгетайлық қызмет ұсынған жерінен 1989 жылы туылған қала тұрғыны ұсталды. Аталған күдіктіге қатысты ҚР Қылмыстық кодексінің 309-бабы 1-бөлігімен, яғни жезөкшелікпен айналысуға арналған притондар ұйымдастыру немесе оларды ұстау, сол сияқты пайдакүнемдік мақсаттағы жеңгетайлық дерегі бойынша қылмыстық іс қозғалып, сотқа дейінгі тергеп-тексеру жұмыстары жүргізілуде.
Сонымен қатар, шара барысында 14 маусым күні көрінеу жезөкшелікпен айналысу үшін үй-жай ұсынып тұрған жерінен 1968 жылы туылған қала тұрғыны ұсталды. Аталған азаматшаға қатысты 450-бабы 1-бөлігі бойынша әкімшілік хаттама толтырылып, шешім қабылдау үшін құжаттар сотқа жолданды.
Аталған бағыттағы жұмыстар өз жалғасын табуда.
