Kyzylorda-News.kz

 Мамыражай маусым айымен бірге оқушылардың асыға күткен жазғы демалысы да келіп жетті. Аудан жеткіншектері жазғы тынығуын қайда, қалай өткізеді деген сауалдың жауабын білмек мақсатта аудандық білім бөлімінің бас инспекторы Мира Жандарбекованың есігін қақтық. Бас инспектор бізге аудан бойынша білім беру ұйымдарындағы оқушылардың 2017 жылға жазғы демалысын ұйымдастыру жөніндегі жоспарымен бөлісті. Оның айтуынша, жазғы демалыс шараларына қатысуға тиісті балалар мен жасөспірімдер саны- 15200. Оның ішінде, 14510 оқушысы сауықтыру және демалыс шараларымен қамтылады деп жоспарланған, яғни 95,5 пайыз.
– Аудан да білім беру ұйымдарында балалардың 2017 жазғы демалыс сауықтыру шараларын ұйымдастыруға байланысты мектеп жанындағы күндізгі лагерлер және «Тау самалы» тынығу лагеріндегі жазғы демалыс шаралары 1 маусымнан басталды. «Тау самалы» 7 ауысымда, мектеп жанындағы сауықтыру шаралары 2 ауысымда жұмыс жасайды. Аймақ басшысының өкімімен бекітілген жоспарға сай, аудандық білім бөлімі арқылы міндетті оқу қоры есебінен балалардың жазғы демалысын ұйымдастыру бойынша мынадай шаралар жүргізіледі. «Тау самалы» тынығу лагеріне- 400 бала, «Облыстық білім басқармасы Олимпиадалар орталығына» -200 бала, Астана қаласына «ЭКСПО-2017» Халықаралық көрмесіне саяхатқа- 500 бала. Жиынтық есепте бюджет есебінен 1100 баланың жазғы демалыс және сауықтыру шаралары ұйымдастырылады – деді Мира Жандарбекова.
Сондай-ақ ол «Тау самалы» жазғы тынығу лагерінің мүмкіндіктеріне тоқталды. Бүгінгі таңда аталмыш тынығу лагерін жаңа маусымға қабылдауға байланысты аудандық денсаулық қорғау басқармасымен қорытынды рұқсат қағазы алынған. 2017 жылғы жазғы маусымда ауысым ұзақтығы 10 күн, сыйымдылығы 150 баладан маусым бойы 7 лекпен барлығы 1050 бала демалады. Жолдама құны 15000 теңге.  
Оған қоса, бас инспектордан 2017 жылдың жазғы маусымында ауданда балалардың жазғы демалысын яғни, сыртқы лагерь, мектеп жанындағы сауықтыру шаралары, үйірме, спорт комплексіне қатысатындар санын білдік.
– Негізінен жоғарыда атап көрсеткендей, бюджет есебінен – 11 00 бала. «Қызылқұм», «Байкен-У» ЖШС қолдауымен – 100 бала Алматы, Оңтүстік Қазақстан облыстары лагерлеріне. Кәсіподақ жеңілдігімен- 262 бала, оның ішінде «Тау самалы» тынығу лагеріне-100, «Облыстық білім басқармасы Олимпиадалар орталығына» – 50, Арал қаласындағы Қамбаш тынығу лагеріне – 15, облыстан өзге жерлерге демалатын балалар – 97. Сонымен қатар, ата-ана қолдауымен, демеушілердің көмегімен және мектеп басшыларының ұйымдастыруымен – 13050 бала тынығудың түрлі бағыттары бойынша демалады. Жалпы, түйіндей айтқанда, барлық жазғы демалыс, сауықтыру тағы басқа шаралармен қамтылатын балалар саны – 14510. Оның ішінде, лагерь және саяхат жасындағы бала саны – 12000, биылғы жазда сыртқа лагерлерге демалатын бала саны – 2300, бұл 95,5 пайызын құрайды, – деді аудандық білім бөлімінің бас инспекторы.
Иә, ел ертеңі әр үйдің үкілеген үміті оқушылардың жақсы демалуына ата-аналар қауымы да аянып қалмасы анық. Не десекте, жас жеткіншектер бос уақыттарын тиімді пайдаланып, жаңа оқу жылына жарқын көңіл күймен келгені абзал.
  Әбдісамат ӘБДІШ.