АЗАЛЫ ТАРИХҚА ТАҒЗЫМ

Бүгін Қызылордада 31 мамыр – саяси қуғын-сүргін құрбандарын еске алу күніне орай митинг өтті. Митингке ҚР Мемлекеттік хатшысы Г. Әбдіқалықова, ҚХА Төрағасының орынбасары Д. Мыңбай, облыс әкімі Қ. Көшербаев, бірқатар зиялы қауым өкілдері мен Оңтүстік Корея, Түркия елдерінен келген ғалымдар қатысты.

Жиналғандар елдікті аңсап, сол жолда мерт болған азаматтарды бір минут үнсіздікпен еске алып, құрбан болғандардың рухына тағзым етті.

Жиырмасыншы ғасырдың басында талайды сарсаңға салып, қасірет шектірген осынау қаралы күннің елімізде жарияланғанына 20 жыл толып отыр. Ұлттық рухы биік қазақтың барлық көрнекті қайраткерлері, ұлт зиялылары осы қасіреттің жазықсыз құрбандары болды.

- Қиын қыстау заманда Қиыр Шығыстан, Еділ бойынан, Солтүстік Кавказдан күштеп жер аударылған түрлі ұлт өкілдері елімізге қоныстанды. Қазақ халқы өздері қуғын-сүргінге ұшырап отырғанына қарамастан тауқымет тартқан барша ұлысты бауырына басты, қамқорлық көрсетті. Соның ішінде Сыр өңірінің жұртшылығы да сырттан келген ағайынға құшағын айқара ашып, қиын кезеңдерде пана болды. Сол алмағайып заманда қалыптасқан өзара татулық пен туыстық қатынастар бүгінгі күнге дейін барынша нығайып, бекіді. Өткен жүз жылдықтың басында Қазақ автономиялық Республикасының алғашқы астанасы болған Қызылорда жеріне Алаш қайраткерлерінің әдебиет, ғылым саласындағы зиялылардың шоғырланып, рухани құндылықтарымызды сақтап қалу жолында күрескені тарихтан белгілі. Оларды қуғын-сүргінге ұшырату арқылы халқымыздың Тәуелсіздікке деген арман мақсатына тұсау салуды көздеді. Бірақ Алаш арыстарының өмірі қатігездікпен қиылса да олардың өз рухын өшіре алған жоқ. Өткенге салауат айтып, саяси қуғын-сүргінге және ашаршылық құрбандарын жадымызда сақтау біздің қасиетті борышымыз, - деді ҚР Мемлекеттік хатшысы Г.Әбдіқалықова.

Шара барысында сөз алған облыс әкімі Қ. Көшербаев: «ХХ ғасырдағы саяси қуғын-сүргін мен ашаршылық – мыңдаған жазықсыз адамдардың қаны мен көзінің жасына суарылған тарихымыздың шерлі беттері. Бас қосып, жиын өткізіп тұрған осы төбе – сол кездегі қанды қырғынның куәсі. Осы жерде қаншама ұлт зиялылардың мүрдесі жерленді. Ендеше, бұл жер – барлығымыз үшін тағзым етіп, бас иетін киелі орын. Сондықтан, қайта жаңғыртудан өткізіп, бүгін пайдалануға беріп отырған ескерткіш маңында шағын аллея мен арнайы тағзым ету орындары қарастырылды», - деді.

Арай мөлтек ауданындағы қуғын-сүргін құрбандарына арналған ескерткішті қайта жаңғыртуға облыстық бюджеттен 142 млн. 470 мың теңге бөлінді. Бұл жоба шеңберінде шағын аллея мен арнайы тағзым ететін орындары салынды. Жарық шамдары орнатылып, кеспе тастар төселген.

Фариза ОМАРОВА