«ДОСТАР АЛАҢЫ» ЕРІКТІЛЕР КЛУБЫ ҚҰРЫЛДЫ
Өткен сенбіде Роза Бағланова атындағы мәдениет орталығында «Жастар Ресурстық орталығы» КММ Қазалы аудандық бөлімінің ұйымдастыруымен «Достар Алаңы» еріктілер клубының ашылуы салтанаты болып өтті. Қоғам өмірінің барлық салаларына жастарды араластыру, аудан бойынша мемлекеттік жастар саясаты өңірлік бағдарламасын жүзеге асыру, ұлттық құндылықтарымызды ұлықтау, жастардың бос уақытын тиімді ұйымдастыру, мемлекеттік бағдарламаларды іске асыру мақсатында өткен шараға мектеп оқушылары, колледж студенттері, «Жастар ресурстық орталығы» КММ аудандық бөлімінің қызметкерлері, жастар ұйымдары, ата-аналар, белсенді жастар мен жас кәсіпкерлер қатысты. Салтанатты шара барысында облыстық «Жас Отан» жастар канатының төрағасы Абылайхан Сабанбаев және «Жастар ресурстық орталығы» КММ Қазалы аудандық бөлімінің директоры Олжас Ахметов алғашқы болып құрылып жатқан «Достар алаңы» еріктілер клубының мүшелеріне сәттілік тілеп, куәліктерін табыстады.
Қазалы ауданы бойынша «Достар алаңы» еріктілер клубының төрағасы болып Шыңғысхан Аманкелді тағайындалды.
Айта кетейік, «Достар алаңы» еріктілер клубының мүшелері «Арман» оқу орталығы, «Алтын Орда» фитнес клубы, «Креатив» сұлулық салоны, «Zero» PS орталығы және «Дублин» дәмханасының қызметтерін 10, 20, 30 пайыз жеңілдікпен пайдалана алады. Аталған сауда орындарының басшылары мен жас кәсіпкерлерге аудандық жастар ресурстық орталығының директоры Олжас Кенжебайұлы аудан жастарының атынан ризашылығын білдіріп, алғысын жеткізді.
Салтанатты шара соңы ауданымыздың өнерлі жастарының концерттік бағдарламасымен жалғасын тапты.
