ҮШ АЙДА 9641 ҚҰҚЫҚ БҰЗУШЫЛЫҚ АНЫҚТАЛДЫ
Облыс көлемінде «Мүлдем төзбеушілік» қағидатын қалыптастыруға байланысты 2017 жылдың 3 айында 9641 әкімшілік құқық бұзушылық анықталды. Осыған байланысты белгіленбеген орындарда сауда жасаған 585, ұсақ бұзақылықпен ұсталған 995, түн тыныштығын бұзған 483 адам әкімшілік жауапкершілікке тартылды. Сонымен қатар, қоғамдық орынға масаң келген 1891, қалалар мен елдiмекендердiң аумақтарын көрiктендiру ережелерiн бұзған 1588, иттер мен мысықтарды күтіп-ұстау ережелерін сақтамаған 707 тұрғынға да осындай жаза қолданылды. Анықталған құқық бұзушылықтар бойынша 222 млн. 105 мың теңге айыппұл салынып, оның 41,5 пайызы, яғни 92 млн. 76 мың теңгесі өндірілді. Облыс орталығында кезең-кезеңімен 272 бейнебақылау камералары орнатылып, жұмыс жасауда.
Жедел басқару орталығы бейнебақылау камераларының көмегімен 53 қылмыстың ізі суымай ашылып, 8906 әртүрлі құқық бұзушылық анықталып отыр. Оның ішінде 7958-і жол ережесін бұзу дерегі.
Қазіргі таңда, бейнебақылау камералары желісінің кеңеюі тұрғындардың қоғамдық орынды ластамауға септігін тигізуде. Оған дәлел, бейнебақылау камералары орналасқан аумақтарда көше ластау деректері азайды.
Облысымыздағы барлық мектептерде, орта білім беру және жоғары оқу орындарында кездесулер ұйымдастырылып, оқушылар мен студенттерге мүлдем төзбеушілік қағидатының мақсаты жан-жақты түсіндіріліп, қоғамдық орындарда бұзақылықтар мен вандализм көріністеріне жол бермеу бағытында профилактикалық шаралар жүзеге асырылуда.
Құзырлы органдармен бірлесіп жастар мен жасөспірімдерді тазалық сақтауға, қоғамдық орындарды ластамауға, саябақтар мен көшелердегі жарықшамдар мен мүліктерді бүлдірмеуге шақыратын насихат шаралары және осы бағыттарда халық көп шоғырланатын орындарға билбордтар орналастырылып, жергілікті бұқаралық ақпарат құралдарынан профилактикалық бағытта бейнероликтер көрсету шаралары үнемі ұйымдастырылуда.
