КӨЛІК ПРОКУРАТУРАСЫ АПАТТЫ ЖАҒДАЙДА ҚОНҒАН BEK AIR ҰШАҒЫНА ҚАТЫСТЫ ТЕРГЕУ ЖҮРГІЗІП ЖАТЫР
Бас көлік прокуратурасы Bek Air ұшағына қатысты оқиғаны тергеп жатыр. Бұл туралы аталған ведомствоның баспасөз қызметі хабарлады. «Қазіргі уақытта болған жағдай жан-жақты тексеріліп жатыр. Заң бұзу оқиғасы анықталса, лайықты жаза қолданылады», - делінген хабарламада. Баспасөз қызметі 17 мамыр күні сағат 23:41-де әуежайдың диспетчерлік қызметінен «Астана-Ақтөбе» бағытында ұшып кеткен «БекЭйр» АҚ-ға тиесілі ұшақтың апаттық сигналдың ойнауына байланысты қайта қонғалы жатқаны жайлы хабар келіп түскенін еске салады. Бортта 108 жолаушы болған, оның 17-і - бала. Сондай-ақ, 6 экипаж мүшесі болған. Өз кезегінде ІІЖБ ұшақтың апаттық жағдайда қону оқиғасын ҚР ҚК 344-бабы 1-бөлігі бойынша сотқа дейінгі тергеудің бірыңғай тізіміне тіркеді. Тергеу шаралары барысында полиция ұшақты тексеріп, тергеу обьектісі ретінде оны жауып тастады. «Қазаэронавигация» РМК-ға ұшақты ұшырмау туралы талап жолданды. Қазіргі таңда Қазақстан Республикасы Инвестициялар және даму министрінің 2017 жылғы 18 мамырдағы №276 бұйрығымен аталмыш оқиғаны тексеру жөніндегі комиссия тағайындалды.
