ҚЫЗЫЛОРДА ОБЛЫСЫНЫҢ ӘКІМІ ШЫҒАРМАШЫЛЫҚ ӨКІЛДЕРІМЕН КЕЗДЕСТІ
Бүгін Қызылорда облысының әкімі Қырымбек Көшербаев ақын Мырзан Кенжебаевпен кездесті. Бұл кездесуге қаламгердің әріптестері де қатысты.Биыл Мырзан Кенжебаев 70 жасқа толып отыр. Осыған орай аймақ басшысы ақынды мерейтойымен құттықтап, ізгі тілегін жеткізді.
- Тарих беттерін парақтасақ Балқы Базар, Тұрмағамбет, Нұртуған, Кете Жүсіп, Шораяқтың Омары секілді жүрегіне жыр жауһарын жинаған Сыр шайырлары бірінен соң бірі тізбектеліп кете береді. Осындай таланттар мен дарындарға Сырдарияның табанын жайлап жатқан Арал топырағы да кенде емес. Нұртуған, Жәмет, Көпжасар, Дәріғұлдар дүниеге келген киелі топырақтан Әбдіжәміл Нұрпейіс, Молдахмет Қаназ, Әбдіраштың Жарасқаны, Қуаныш Жиенбай, Шөмішбай Сариев секілді арналы ақындар мен жазушылар түледі. Осылардың арасынан сырлы жырларымен оқырманының сүйіктісіне айналған Мырзан Сахиұлын да бөліп айтуға болады,- деді облыс әкімі Қ.Көшербаев.
Мырзан Кенжебаевқа аймақ экономикасын дамытуға қосқан үлесі үшін Қызылорда облысының Құрмет грамотасы табысталды. Содан соң Мырзан Сахиұлын әріптестері, ҚР Мемлекеттік сыйлығының лауреаты, «Құрмет» орденінің иегері Есенғали Раушанов пен ҚР Жазушылар Одағының мүшесі Мереке Құлкенов құттықтады.
