Kyzylorda-News.kz

     Ә.Тәжібаев атындағы облыстық ғылыми-әмбебап кітапханасында Қызылорда облыстық ішкі саясат басқармасы мен «Медиа-Пресс» қоғамдық қорының ұйымдастыруымен «Аймақта мемлекеттік тіл саясатын іске асыру» әлеуметтік жобасы аясында Оралхан Бөкей атындағы көркемсөз оқу шеберлерінің ХІХ облыстық байқауы өтті.

    Байқаудың мақсаты - мемлекеттік тілдің қолданыс аясын кеңейту, тіл мәдениетін көтеру, көркем әдебиетті насихаттауды жандандыру және талантты жастарды табу.

    Байқауға Қызылорда қаласы мен Арал, Қазалы, Қармақшы, Жалағаш, Шиелі, Жаңақорған аудандарында өткен байқаулардың жеңімпаздары мен мемлекеттік мекеме қызметкерлері, жоғары және арнаулы орта оқу орындарынан 17-35 жас аралығындағы 16 талапкер қатысты.

    Талапкерлер байқауда Оралхан Бөкейдің шығармашылығымен қоса, басқа да қазақтың белгілі ақын-жазушыларының кез-келген көркем және драмалық шығармаларынан үзінді оқыды.

    Талапкерлердің өнерін Қорқыт Ата атындағы Қызылорда мемлекеттік университетінің қазақ тілі мен әдебиеті және журналистика кафедрасының доценті, филология ғылымдарының кандидаты Айтбаева Айман Ералықызы басқарған қазылар алқасы бағалады.

    Байқаудың сарапшылары үміткерлердің өнерін бағалау кезінде олардың көркем мәтінді оқу шеберлігіне, дауыс мәнеріне және тіл тазалығына, көркем мәтінді таңдау талғамына, сахналық және оқу шеберлігіне, сондай-ақ, сахналық киім мәдениетіне баса назар аударды.

    Байқау қорытындысы бойынша Қазалы ауданы, Кәукей ауылының тұрғыны Насыр Айсұлу І орынды жеңіп алса, Арал ауданындағы №13 орта мектептің география пәнінің мұғалімі Қыстаубаев Алтынбек ІІ орынды, Жаңақорған ауданындағы №1 «Кәмшат» балабақшасының әдіскер-психологы Кекілбаева Айдын ІІІ орынды жеңіп алды.

    Қызылорда медициналық жоғары колледжінің студенті - Төлебаев Ердос, «Болашақ» университетінің студенті - Тоқтанова Қымбат, И. Әбдікәрімов атындағы Қызылорда аграрлық-техникалық жоғары колледжінің студенті - Садықова Назгүл ынталандыру сыйлықтарына ие болды.

    Байқау жеңімпаздары басқарманың дипломдарымен және ескерткіш сыйлықтарымен марапатталды.