ҚАМШЫБЕК – КҮМІС ЖҮЛДЕГЕР
Ташкентте бокстан өткен Азия чемпионаты мәреге жетті. Жалпыкомандалық есепте қоржынында 9 алтыны бар өзбек боксшылары бірінші орынға шығып, Азия құрлығында көш бастады. Ал 1 алтын, 3 күміс, 4 қола медаль иеленген Қазақстан екінші орында тұр. Чемпионат алдында ел құрамасының жаттықтырушылары біздің спортшылар кемі 3 алтын алады деп болжам жасаған. Финалға 4 боксшымыз шығып, олардың арасында тек былтыр өткен Рио олимпиадасының күміс жүлдегері Василий Левит (91 келіге дейін) қана Азия алтынына қол жеткізді. Ал 3 күміс жүлденің бірі финалдық жекпе-жегін бүгін өткізген аса ауыр салмақтағы боксшы, жерлесіміз Қамшыбек Қоңқабаевқа бұйырды.
