Kyzylorda-News.kz

     Сәуір айының 17-21 аралығында Алматы қаласындағы «Бөбек» ұлттық ғылыми-практикалық білім беру және сауықтыру орталығының ұйымдастыруымен белгілі астроном Төкен Омаров атындағы республикалық ғарыштық физика мен астрономия ғылыми сайысы өткізілді. Оған Қызылорда облысынан №4 Облыстық дарынды балаларға арналған мектеп интернатының оқушылары Н.Байқожа және А.Өмірзақ, №15 мектеп-лицей оқушысы Д.Шахмет және Жаңақорған ауданы №167 орта мектеп оқушысы А.Сансызбай қатысты. Жарыс барысында республиканың түкпір-түкпірінен жиналған оқушылар ғарыштық физика және астрономия тақырыптарында ғылыми жобалар қорғап, осы пәндерден олимпиадаға қатысты. Кескін карта арқылы жұлдыздарды табу бойынша сынақ тапсырды. Қызылордалық «Жас астрофизиктер» командасының өзін-өзі таныстыруы профессорлар мен докторлардан құралған әділқазылар алқасының көңілінен шықты.

    Қызылорда облысы командасының тұсаукесері слеттің салтанатты жабылу шарасында қайталанып көрсетілді.

    Д.Шахмет және А. Сансызбай «Бөбек» орталығының бас директоры И.В. Логинованың  және обсерватория директоры Н.Ә.Бейсеннің Алғыс хаттарымен марапатталды. Сонымен қатар, Н.Байқожа мен А.Өмірбек жоғары білім көрсеткендері үшін ІІ  дәрежелі дипломдарға ие болды.

    Жарысқа қатысқан оқушыларға телескоп арқылы түнгі жұлдызды аспанды тамашалау мүмкіндігі туғызылды.