ТЕЛЕКОММУНИКАЦИЯ САЛАСЫНДАҒЫ «ҮЗДІК МАМАН» АНЫҚТАЛДЫ
Қызылорда областық телекоммуникациялар дирекциясы магистральді және жергілікті телекоммуникация желілерінің талшықты-оптикалық кабельді дәнекерлеушілер мен цифрлық желілерге қызмет көрсететін мамандар арасында кәсіби шеберлік конкурсын өткізді. Конкурстың басты мақсаты – негізгі жұмыс мамандықтарының беделін арттыру, техникалық блоктың үздік мамандарын айқындау, сонымен қатар тәжірибе алмасу мен қызметкерлердің шығармашылық ынталарын дамыту болды.
Қатысушылар еңбекті қорғау және қауіпсіздік техникасын сақтап, берілген уақытта талшықты – оптикалық байланыс желісін күту мен пайдалану бойынша теоретикалық және тәжірибелік тапсырмаларды орындады.
Конкурс комиссиясының шешіміне сәйкес техникалық қызмет көрсету орталығының жетекші инженері Нұрсұлтан Әлімбетов, техникалық қызмет көрсету орталығының электромонтері Айгерім Сұлтанбекова, Шиелі желілік техникалық цех электромеханигі Рақымжан Жұмабеков жеңімпаз болып танылды.
«Қазақтелеком» АҚ «Үздік маман» республикалық конкурсына Қызылорда облыстық телекоммуникация дирекциясы атынан конкурс жеңімпазы Нұрсұлтан Әлімбетов қатысатын болады.
