ҚАЗА ТАПҚАН ӨРТ СӨНДІРУШІЛЕРДІ ЕСКЕ АЛДЫ
Қаладағы №1 мамандандырылған өрт сөндіру бөлімінде батыр өрт сөндірушілердің ескерткіштеріне салтанатты түрде гүл шоғын қою рәсімі өтті. Рәсімге жалын ортасында қалған жалынды жастар Арман Төлеубаев пен Арғын Әшірбековтің туыстары мен жақындары қатысты. Өрт сөндіру қызметіндегі әріптестері мен ардагерлер қаза болғандарды бір минуттық еске алды. Жиынды ашқан департамент бастығы, азаматтық қорғау полковнигі О.Бержанов «Бұл азаматтар өмірден кетсе де, көңілден кетпейді. Бүгінгідей қасиетті дәстүр жас ұрпаққа абырой мен міндетті сезіндіріп, патриотизмге тәрбиелейді.» - деді өз сөзінде.
Қаза болған өрт сөндірушілерді жақындары мен ардагерлер еске алып, сөз сөйледі. Қызылордалық өрт сөндірушілер үшін аға өрт сөндіруші, ішкі қызмет сержанты Арман Төлеубаев пен аға өрт сөндіруші, ішкі қызмет сержанты Арғын Әшірбековті мәңгі есте сақтайды. Даңқты өрт сөндірушілердің жаңа толқыны олардың қайсар ерлігін үлгі тұтып, тәрбиеленуде.
Қаза болған өрт сөндірушілердің ескерткішіне гүл шоғын қою рәсімінің соңында ТЖД бөлімшелері туды биік көтеріп, әскери сап түзеп, салтанатты маршпен жүріп өтті.
