ЖАҒДАЙЫ ТӨМЕН ОТБАСЫНА КӨМЕК КӨРСЕТІЛДІ
«Нұр Отан» партиясы Қазалы аудандық филиалы ғимаратында «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасын» жүзеге асыруды қамтамасыз етуші мемлекеттік органдарға халықты жұмыспен қамту бағдарламаларын түсіндіруге арналған қабылдау өтті. Қабылдауды «Нұр Отан» партиясы Қазалы аудандық филиалы төрағасының бірінші орынбасары Қасқырбек Мәмбетжан, кәсіпкерлер палатасының Қазалы аудандық филиалының директоры Ермек Аймаханов, аудандық халықты жұмыспен қамту орталығының бас маманы Әділхан Абилов және аудандық партия филиалының консультанты Гүлдәрі Иманалиева жүргізді.
Қоғамдық қабылдауда Әйтеке би кенті, Жанқожа көшесі №135 үйдің тұрғыны Роза Әбдірахманова күйеуі де өзі де жұмыссыз екенін, бастарында баспаналары жоқтығын айтып, көмек сұрады. Тұрғынның өтінішіне аса назар аударған аудандық партия филиалы төрағасының бірінші орынбасары Қасқырбек Өмірзақұлы тиісті орынмен байланысып, жомарт жандардың демеушілігімен тұрғынға пәтер жалдап көмек көрсетті. Көмекке разы болған Роза ана «Нұр Отан» партиясына алғысын айтты.
Жоспарлы түрде өткізілген тақырыптық қабылдауға түскен өтініштердің біршамасы жүйелі түрде шешімін тапты.
