Kyzylorda-News.kz

     Қызылорда қаласы Назарбаев Зияткерлік мектебінде оқушылардың кәсіпкерлік қабілеттерін нығайтып, қолдау көрсетуге бағытталған «NIS Kyzylorda Startup» жобасы іске қосылды.

    «NIS KyzylordaStartup» жобасы - 9-11 сынып оқушыларының кәсіпкерлік дағдыларын дамыту арқылы жас кәсіпкерлердің кәсіби және тұлғалық дамуына жәрдемдесуге, оқушылардың жаңа бизнес-бастамаларын қолдауға арналған байқау.

    Алғашқы кезеңде оқушылардан барлығы 170-ке жуық өтінім келіп түсті. Бүгін осы өтінім берген оқушы топтарға бизнесті жоспарлау, бизнес-стратегияның маңыздылығы, маркетинг жасау және қаржыны ұтымды пайдалану бойынша кәсіби көмек көрсетілуде.

    Өңірлік кәсіпкерлер палатасымен бірлесе ұйымдастырылған алғашқы семинар-тренингте оқушылар Өңірлік іскер әйелдер кеңесінің төрайымы, Қызылорда облыстық Кәсіпкерлер палатасында «Бизнес-консультант» және «Бизнес-өсу» бағдарламаларының бизнес-тренері Жанна Амановамен жүздесіп, кәсіпкерлік туралы жалпы ақпарат алып, жаңа бизнесті бастаудың негізгі сатыларымен танысты. Түрлі ойындарды ұйымдастыру арқылы Жанна Нұрланқызы оқушыларды креативті ойлауға, кедергілерге төтеп бере алуға, көшбасшылық қабілеттеліктерді пайдалана білуге шақырды.

    Мамыр айында ұсынылған бизнес жобаларды іріктеу кезеңі өткізіледі. Бұл кезең дементорлардан, жеке кәсіпкерлерден құралған конкурстық комиссия ең үздік бірнеше бизнес жобаларды іріктейді және ақтық кезеңге жолдама береді.

    Байқаудың қорытынды кезеңінде, яғни қазан айында оқушылар өз жұмыстарын қорғап, конкурстық критерилерге сәйкес үздіктер анықталатын болады. Бизнес-идеялардың жаңалығы және бірегейлігі, әлеуметтік және экологиялық әсерлері ерекше назарға алынады.