Kyzylorda-News.kz

     Алматыда ҚМДБ төрағасы, Бас мүфти Ержан қажы Малғажыұлының төрағалығымен өтіп жатқан Ғұламалар кеңесінің XVI отырысында сауда-саттықтағы кепілақша мәселесіне пәтуа шығарды. Бұл туралы басқарманың  баспасөз қызметінен хабарлады.

    Кепілақша деп затты сатып алу үшін немесе мүлікті жалдау үшін ақшасының бір бөлігін алдын-ала төлеуді айтады. Егер тауарды сатып алатын болса немесе жалдайтын болса кепілақшаны сол заттың құнына немесе жалдаудың төлеміне қосып есептейді. Ал мүлік сатып алынбаған яки жалданбаған жағдайда кепілақша сатушының, жалға берушінің иелігінде қалады.

    Кепілақша сауданы жүзеге асыруға әрі одан басқа затты сатып алмауына кепілдік береді. Сондай-ақ, ол – сатып алушының затты алуға ниетті екендігін нақтылайтын  келісімшарт.

    Халықаралық ислам фиқһ академиясы сегізінші отырысында ғалымдар кепілақша саудасына қатысты мынадай қарар шығарды: «Егер кепілақшаны белгілі бір уақытқа дейін шектеп қойып, сосын сол аралықта тауарды алса, онда алдын ала берілген ақша заттың сомасына қосылып есептеледі. Ал шарт бойынша белгіленген уақыттан кешіксе, ақша сатушының иелігінде қалады.

    Ғұламалар кеңесі отырыс соңында «Сауда барысында сатып алушы затты алмаған жағдайда кепілақша сатушыда қалады, сонымен қатар,. кепілақша сомасы жергілікті қолданысқа қарай тараптардың келісімі бойынша белгіленеді әрі ол тауар құнының бір бөлігі болып есептеледі» деген пәтуа шығарды.