Kyzylorda-News.kz

     Қазалы ауданының мәдениет және тілдерді дамыту бөлімі мен аудандық білім бөлімінің бірлесіп ұйымдастыруымен қазақ тілінде оқитын жастардың арасында орыс тілін таныту, орыс тілін меңгерген дарынды жастарды анықтау мақсатында «Ой - сана» атты орыс тілі білгірлерінің аудандық байқауы өткізілді.

    Сайысқа онға тарта талапкер қатысты және олар бірінші кезеңде орыс тілінің лексика-грамматикасын білуге арналған тест тапсырмаларын орындаса, екінші кезеңнің жазбаша бөлігінде берілген тақырыпта эссе жазды және викториналық бөлігінде орыс тілі, әдебиеті мен мәдениеті, салт-дәстүрлері жайында викториналық сұрақтарға жазбаша жауап берді. Үшінші кезеңде кез келген жанрдағы мәтінді мәнерлеп оқудан сынға түсті.

    Арнайы құрылған қазылар алқасының құрамында аудандық білім бөлімінің әдіскері Қалиев Ұлан, №249 мектеп-лицейдің орыс тілі пәнінің мұғалімі Жарасова Шамшырақ, аудандықмәдениет және тілдерді дамыту бөлімінің жетекші маманы Тасыбаева Раиса болып, Үміткерлердің білімі мен біліктілігін бағалады.

    Нәтижесінде бірінші орынды №249 мектеп-лицейдің мұғалімі Эльвира Қожахметова жеңіп алса, жүлделі екінші №258 мектептің мұғалімі Сәндігүл Жалғасбай, үшінші орынды №70 мектептің мұғалімі Назгүл Сағындықова иеленді. Жеңімпаздар арнайы диплом, бағалы сыйлықтармен марапатталды.