Kyzylorda-News.kz

     Мектеп мұғалімдерінің басты міндеті білімді де тәрбиелі шәкірт тәрбиелеуге бар күштерін жұмылдыру. Осы мақсатты көздеген №10 дарынды балаларға арналған облыстық «Білім-инновация» лицей-интернатының ұстаздары түрлі облыстық, республикалық білім бәйгелерінде оза шауып, абырой биігінен көрініп жүр. «Көп тілді меңгерген ұстаз», «Жаңашыл сынып жетекші», «Үздік педагог» тәрізді байқаулардың жеңімпазы атанған ұстаздардың жолын жас маман, технология пәнінің мұғалімі Сәбила Ибрашева  жалғастырды.

    2017 жылдың 3 сәуірінде облыстық оқу орталығының ұйымдастыруымен өткен «Дарынды балаларға - талантты ұстаз» педагогикалық олимпиадасының облыстық кезеңінде С.Ибрашева I орынды иеленіп, республикалық олимпиадаға жолдама алды.

    Байқауға қатысқан жас ұстаздар өздерінің білім, біліктерін көрсетіп, үш бөлім бойынша сынға түсті. «Педагогикалық дебют»  деп аталатын бірінші бөлімде заманауи талаптарға сәйкес білім беру технологияларын пайдаланудың тиімділігі туралы өзінің кәсіби іс-тәжірибесін таныстырды. Екінші бөлімде «Педагогикалық шеберлік қоймасы» тақырыбында панорамалық сабақ көрсетті. Байқаудың соңғы бөлімінде жас ұстаздардың портфолиосы сараланды.

    С.Ибрашева байқаудың әр бөлімінде шығармашылығымен ерекше көзге түсіп, ұсынылған жұмыстары жоғары бағаланды.