АУҚЫМДЫ АКЦИЯ БАСТАУ АЛДЫ
Шиелі ауданында «Көктемгі ағаш отырғызу күні» акциясы болып өтті. Бұл шараға мекеме, кәсіпорын қызметкерлері, аудан тұрғындары мен жастары да белсене қатысты. Акция барысында аудан көлемінде 5000-нан астам ағаш көшеттері отырғызылып, бұрын егілген көшеттерді күтіп-баптау жұмыстары да жүргізілді.
Аралда да көктемгі санитарлық тазалық айлығы аясында аудандық орталық мешіт ауласына ағаш отырғызу акциясы болып өтті. Акцияға аудан әкімдігінің бөлім қызметкерлері, мекеме басшылары мен белсенді жастар қатысып, көркейту-көгалдандыруға өз үлестерін қосты.
Аталмыш акциядан соң жастар ресурстық орталығының белсенді жастары қаладағы темір жол өткелінің айналасына жасалып жатқан тазалық жұмыстарына қолқабыс етті.
Қармақшыда да сенбілік жұмыстары «Бүкілқазақстандық ағаш егу күні» аясындағы шараларға орайластырылды. Қоршаған ортаны көгалдандыруды басты мақсат еткен ізгілікті шараға аудан әкімі С.Мақашов, аудан ардагерлері, жастар өкілдері, білім, мәдениет, медицина саласының қызметкерлері және кент тұрғындары атсалысты. «Атадан мал қалғанша – тал қалсын» деген аталы сөзді берік ұстанып, көктемгі тал егу акциясына жұмыла қатысқан азаматтардың белсенді әрекетінің арқасында көше бойларына, «Д.Мырзағалиева», «Қазақ елі» аллеясына, «Этно ауыл», дендропарк және «Жастар» саябағына терек, үйеңкі, Сыр талы сынды ағаш көшеттері отырғызылды.
Айналаны көгалдандыру – жалпыға ортақ ізгі міндет. Биыл Жалағаш ауданында 30 мың түп ағаш егу жоспарланған. Сол шара «Бүкілқазақстандық ағаш отырғызу күні» аясында кент пен барлық ауылдық округтерде өткен акциядан бастау алды. Акция барысында 10 мың түп ағаш отырғызылды. Шараға аудан әкімінің орынбасары Ж.Тажмаханов, Жалағаш аудандық «Нұр Отан» партиясы филиалы төрағасының бірінші орынбасары Қ.Мұстафаева, бөлім, мекеме басшылары, ардагерлер мен жастар, сонымен қатар, аудан тұрғындары да біркісідей қатысты.
Аудан әкімінің өкіммімен көктемгі көркейту – көгалдандыру және санитарлық тазалық жұмыстары 10 наурыздан бастау алған. Содан бері аудан көлемінде өткізілген сенбілік жұмыстарында көшелерді күл-қоқыстардан тазартылып, әктеу, сырлау жұмыстары жүргізілуде.
