Kyzylorda-News.kz

    «Шырақ» клиникасы Қызылорда облысына ғана емес, өзге өңірлерге де жақсы танымал. Аталған орталық көздің көру қабілетін субъективті және объективті зерттеу бойынша офтальмологиялық қызметтің барлық түрін, көз жанарының рефракциясы, көздің алдыңғы бөлігіне биомикроскопия және тағы басқа қызметтер көрсететін аймақтағы жалғыз клиника болып табылады. Жоғары санаттағы дәрігер-офтальмолог Дина Сүлейменова офтальмологиялық орталықтың негізін қалағанына небәрі 7 жыл толса да, қысқа мерзім ішінде ол үлкен нәтижелерге қол жеткізді.  

     Дина Сүлейменоваға жек ісін бастауда ері жан-жақты көмек көрсетті.  Бүгінде олар танымал «Шырақ» клиникасын  бірге басқарып келеді.

    - «Көз қорқақ, қол батыр» деген сөздің жаны бар, жаңа бизнес бастайтын кезде барлық адамда қорқыныш туындайтыны рас. Ең бастысы біз кедергілерден өтіп, клиника жұмысын жөнге қойдық. Бүгінде орталығымызда кеңес беруден бастап көздің кемшілігін түзетуге дейінгі біршама қызмет түрлері көрсетілуде. Біздің басты құндылығымыз мамандарымыз деп білемін. Орталық персоналы тек жоғары  санаттағы сапалы қызмет көрсететін білікті мамандарған құралған. Осының арқасында біз өз емделушілеріміздің сенімінен шығып, клиникамыз аймақта үнемі үздіктер қатарынан көрінуде,- дейді Дина Сүлейменова.

    Өткен жылы кәсіпкерлік қызметін дамыту үшін Дина «Бизнестің жол картасы 2020» бизнесті қолдау мен дамытудың бірыңғай бағдарламасы аясында 14% үстемемен несие рәсімдеді және пайызды субсидиялау бағдарламасының көмегімен кәсіпкердің несие ауыртпалығы 2 есеге төмендеді.

     - Несие қаражатын клиникада ұсынатын қызмет түрін көбейтуге мүмкіндік берген көздің микрохирургиясына арналған ең соңғы үлгідегі жоғары технологиялық хирургиялық құрылғы сатып алуға жұмсадық. Біздер осыған дейін науқастарға диагностика жасап, тексеруден өткізген соң хирургиялық ем алуы үшін басқа қалаға жолдайтынбыз, қазіргі таңда қол жеткізген жаңа құрал-жабдықтардың көмегімен ота жасайтын арнайы кабинет ашып, шел басқан көздерге микрохирургиялық әдіспен ем жасаймыз. Мемлекеттік қолдаудың арқасында біз бизнесті дамыту бойынша өз жоспарымызды жүзеге асырып, жаңа жұмыс орындарын аштық,- дейді Дина Сүлейменова.