Kyzylorda-News.kz

 

    Қызылорда облысы жастар саясаты мәселелері жөніндегі басқармасының қолдауымен еңбек маусымының жұмысын қорытындылау, үздік сарбаздарды, жасақтарды және аймақтық штабтарды марапаттау мақсатында 2014 жылғы «Жасыл Ел» студенттік құрылыс және жастар жасақтары маусымының салтанатты жабылуы өтті. Бұл туралы басқарманың баспасөз қызметі хабарлады.
    Облысымызда алғаш рет қаладағы «Орда» мейрамханасында «Жасыл ел» еңбек жасағында жұмыс жасаған белсенділер арасында жастар балы ұйымдастырылды.
    Елбасының халыққа арнаған дәстүрлі Жолдауы негізінде құрылған көшбасшы жастар ұйымы  Қызылорда өңірінде де 9 жылдан бері белсенді қызмет атқарып келеді. Еңбек жасағына 2013 жылы 500 сарбаз тартылып, аталмыш қызметке 7 млн, 750 мың теңге қаржы бөлінсе, биылғы жылы 1000 сарбаз еңбек майданына атсалысып, көзделген қаржы көлемі 26 млн. теңгені құрады.  Жасыл елдегі жастар қатары тек қана аймағымыздың көгалдануына ғана емес, оған қоса біздің ортақ шаңырағымыз — Қазақстанның өркендеуіне жаңа буынды  тәрбиелеуде маңызы зор.  
    Еңбек жасағының маусымдық жабылу салтанаты жоғары деңгейде өтті. «Жасыл елдік» жастармен қатар жастар ұйымдарының белсенділері арнайы марапатталып, 80 ге жуық жас вальс билеп, қызықты кеште арнайы лотереялық ойынға қатысады.   
    Фариза ОМАРОВА