Kyzylorda-News.kz

 

    Түркі халықтарына ортақ абыз – Қорқыт атаның ұрпаққа қалдырған мәдени жәдігерлерінің ЮНЕСКО-ның мәдени мұралары тізіміне енетін күн жақын, деп хабарлайды 24.kz.  

    Осылайша қазақ сахарасында туған ұлы тұлғаның күллі рухани туындысы барша адамзаттың құнды мирасқоры саналып, арнайы қорғауға алынбақ. Рухани болмысымыздың алтын арқауы саналатын Қорқыт баба қалдырған гуманистік ниеттегі дидактикалық мұралары, өсиет-қағидалары қоғамның бүгінгі тыныс-тіршілігімен толық үйлесім тауып отыр. Абыздың тұтас дәуір шежіресін бойына сыйғызған күйлері халықтық фольклор арқылы бүгінге жетті.
    - Қазақ өнері мен мәдениетінде қалғаны – 12 күй. Айтулы «Аққу», «Ұшардың ұлуы», «Бәшпай» сияқты ұлы күйлері орындалып, бүгінгі таңда киелі қобыз аспабын жасаушы, күй өнерін дамытушы, күй атасы деп Қорқыт атамызды айта аламыз. Қорқыт туралы сан тарау аңыз бар. Сол құндылықтарды жіктеп-жіліктеп сақтап, өскелең ұрпаққа табыстау мақсатында Сыр елінде Қорқыт ата және өлкетану ғылыми зерттеу институты құрылды,-дейді жыршы Серік Жақсығұлов.  
    Облыстық кәсіпкерлік және туризм басқармасы басшысының міндетін атқарушыАзамат Досжановтың айтуынша Халықаралық көрменің туристік маршрутына орай ұлы абыз кешеніне ТМД елдерінен туристердің көптеп келуі жоспарланып отыр.  Франция, Англия, Германия және Қытайдан да қызығушылық танытып отырғандар жетерлік.  
    Жалпы Қорқыт кешені өңірдегі рухани-тарихи мұралардың қайта жаңғыруына жол ашты. Бұл аймақтың бар кереметін жаһандық деңгейде паш етудің таптырмас мүмкіндігі болып отыр.