Kyzylorda-News.kz

 

    Қызылордада Сыр бойы қазақтарының Хиуа, Қоқан хандықтарының езгісіне және Ресей отаршылдарына қарсы ұлт-азаттық көтерілісінің басшысы, қазақ халқы батырларының ішіндегі бірегейі – Жанқожа Нұрмұхаммедұлына арналған ескерткіш ашылды.  Биыл 240 жылдығы тойланып жатқан батырдың ұрпақтары бабасын ұлықтауды естен шығармады.
    Ескерткіштің ашылу салтанатында қолына найза алып, жауға қарсы атой салған Жанқожа батырдың  ерлігі мен өр рухы жайында естеліктер айтылды. Ашылу салтанатына халық көп жиналды. Салтанатты шарада облыс әкімі Қырымбек Көшербаев сөз алып елін жауға бермеген батыр бабалардың атын ардақтау өскелең ұрпаққа өнеге боларын жеткізді. Мерейтой аясындағы бұл тамаша тарту шаһардың ажарын аша түсер маңызды нысанның біріне айналарына сенім білдіріп, ескерткіштің алдына гүл шоқтарын қойды.
    Сонымен қатар, жиынға Мемлекет және қоғам қайраткері Ұ.Қараманов, облыстық Қорғаныс істері жөніндегі департаментінің басшысы, генерал-майор Ә.Ерниязов, республикалық ардагерлер кеңесінің төрағасы Ө.Озғанбаев сынды ел ағалары қатысып, Сыр жұртшылығын ескерткіштің ашылуымен құттықтады.
    Тек Жанқожа батырдың батылдығын ғана емес, қазақтың жүрек жұтқан тұлғасын танытып тұрған Қызылорда қаласының вокзал алаңына орнатылған ескерткіш жұртшылық тағзым етер тарихи орынға айналары сөзсіз.
    Фариза ОМАРОВА