Kyzylorda-News.kz

 

    Ел мен Елбасы егіз ұғым деп қарайтын сырбойылықтар да Тұңғыш Президент күнін айрықша атап өтіп жатыр. Мереке қарсаңында аймақтың барлық білім беру ұйымдарында тағылымды-танымдық сабақтар өткізілді.

    Ал Жаңақорған ауданында қолөнер орталығы ашылды, деп хабарлады «24 хабар». Сондай-ақ Қазалыда жаңа аудандық аурухананың іргетасы қаланды. Қазақстан халқын жарқын істерге жұмылдырып, ішкі қоғамдық татулық пен келісімді нығайтып қана қоймай, жаһандық бейбіт бастамалардың авторы ретінде мойындалған – Ұлт көшбасшысының құрметіне белгіленген мереке өзіндік сән-салтанатымен атап өтіліп жатыр.
    Сырбойылық жастардың «Тәуелсіздік және Елбасы» тақырыбында өткен форумда кіші буын өкілдері ұлағатты ардагерлердің тебіреністерінен елі қалаған Елбасының епті істеріне тағы бір қанықты. Ұлт көшбасшысының өмірі мен қызметі туралы библиографиялық жазбалар мен құнды деректер Әбділда Тәжібаев атындағы облыстық әмбебап ғылыми кітапханасында ұсынылған кітап көрмесінде көрініс тапты. Шарада Тәуелсіздіктің құрдастары Отан туралы өлеңдер оқып, патриоттық әндер шырқалды. Барлық қатысушыларға Елбасының еңбектері жазылған «Тұңғыш Президент» атты буклеттер таратылды.
    Мерекелік шаралар тізбегі Нартай Бекежанов атындағы қазақ музыкалық-драма театрында жалғасты. Қызылордалықтар аймақтың кәсіби фотографтарының 100-ге жуық туындылары ұсынылған «Елін сүйген Елбасы» атты фотокөрмені тамашалады. Сырдың бас мәдени ошағының сахнасында облыстың үздік өнер ұжымдары концерт қойды. Ал орталық алаңда 500-дей студенттің қатысуымен флешмоб өткізілді. Азат елдің аспанына жүздеген үрленген шар ұшырылды.