ОБЛЫС ӘКІМІ «ҚОРҚЫТ ЖӘНЕ ҰЛЫ ДАЛА САЗЫ» ХАЛЫҚАРАЛЫҚ ДӘСТҮРЛІ МУЗЫКАЛЫҚ ӨНЕР ФЕСТИВАЛІНЕ КЕЛГЕН ҚОНАҚТАРМЕН КЕЗДЕСТІ
Аймақ басшысы Қырымбек Көшербаев аймақтағы атқарылып жатқан мәдени-әлеуметтік шараларды айтып, облыстың бүгінгі тынысын баяндады. «Қорқыт ата мұралары – түркі халықтарының рухани қазынасы» атты халықаралық ғылыми-теориялық конференция аясында өтетін алдағы іс-шаралар жоспарымен таныстырды. Кездесу соңында облыстың негізгі даму салаларын суреттейтін бейнефильм көрсетілді.
Халықаралық ғылыми-теориялық конференцияға келген мәртебелі меймандар қатарында ТҮРКСОЙ халықаралық ұйымының бас хатшысы Д.Қасейінов, жазушы, саясаткер О.Сүлейменов және Әзірбайжан, Түркия, Ресей, Молдова, Қырғызстан мемлекеттерінен келген шетелдік ғалымдар мен саясаткерлер бар.Қазан айының 8-9 жұлдызында Түркі тілдес халықтардың «Қорқыт және Ұлы Дала сазы» атты дәстүрлі халықаралық музыкалық өнер фестивалі аясында «Тұран және түркі әлемі» атты Сыр елі қолөнер шеберлерінің этно-археологиялық көрмесі мен халықаралық ғылыми-теориялық конференция және өзге де мәдени іс-шаралар ұйымдастырылады.
