Kyzylorda-News.kz

 

    Қорқыт Ата атындағы Қызылорда мемлекеттік университеті Ұстаздар мерекесіне орай, «Ұстаз – білім шамшырағы» атты мерекелік кеш өткізді. Шарада университет ректоры, т.ғ.д., профессор Қ.А.Бисенов ұстаздардың қоғамдағы орнына тоқталып, қонақ ретінде шақырылған ардагер-ұстаздарды, оқытушылар қауымын кәсіби мерекелерімен құттықтады.

    Мерекелік кеш барысында 2015-2016 оқу жылындағы білім беру қызметіндегі жетістіктерін бағалау жөніндегі университет рейтингісі бойынша ең жоғары балл жинаған 5 профессор-оқытушыға университет ректоры «Қорқыт Ата атындағы Қызылорда мемлекеттік университетінің үздік оқытушысы» медалін тақты. Жалпы, рейтинг қорытындысымен 100 профессор-оқытушыға жыл бойы төленетін үстеме ақы тағайындалды. Бұл үрдісті университет жыл сайынғы дәстүрге айналдырған. Сондай-ақ шарада бірқатар ұстаздар «Нұр Отан» партиясы Қызылорда облыстық филиалының Алғыс хатымен, «Қорқыт Ата атындағы Алтын медальмен», университет ректорының Алғыс хатымен марапатталды. Ардагер-ұстаздар арасында өткен шахмат турнирінің нәтижесі жария етіліп, жүлдегерлерге бағалы сыйлықтар берілді.
    Айта кету керек, ұстаздарын ұлықтаған білім ордасында бүгінде 500-ден аса маман оқытушы болып қызмет атқарады. Оның 22-і ғылым докторы, профессор, 6-ауы PhD докторы, 217-і ғылым кандидаты мен доцент, 179-ы ғылым магистрі.