ТРАМП ТЕНТЕКТІК ТАНЫТТЫ
Кеше Брюсселдегі НАТО-ның жаңа штаб-пәтерін аралау барысында тосын оқиға болды. Альянстың бас хатшысы Йенс Столтенберг өткізіп жатқан шарада алдында тұрған Черногория премьер-министрі Душко Марковичті итеріп жіберген АҚШ президенті Дональд Трамп қонақтардың ортасына ентелей кірді. RTBF телерадиокомпаниясы таратқан видеода АҚШ басшысының мұнысына басқалардың таңғалып қалғаны байқалады. НАТО жаңа штаб-пәтері Брюсселде өткен Солтүстікатлантикалық кеңестің самииті аясында ашылып отыр.
Осы оқиғаға байланысты пікір білдірген Ақ үй өкілдері өз президенттері НАТО-ға мүше елдердің көшбасшыларының ережелеріне сәйкес жүріп-тұрды дегеннен әрі аспаған.
