АЛЫП ПИТОН АДАМ МЕН ИТКЕ ТАП БЕРДІ. ВИДЕО
Флорида штатындағы Пемброк-Пайнс қаласының тұрғыны Джозеф Лискински аяқ астынан өзіне тап берген алып жыланның бетін қайтарды. Арпалыста Джозефтің саусағын тістеп үлгірген жылан жеңіліп бара жатқасын жалт бұрылып, оның итіне қарай ирелеңдей жөнеліпті.
Вести.Ру басылымының хабарлауынша бұған да асып-саспаған америкалық итіне қарай жүгіріп, екіметрлік питонды қолға түсірген. Осы сәтте Лискинскидің әйелі құтқарушыларды шақырып үлгеріпті. Джозеф ұстап алған жыланды солардың қолына тапсырды.
Жалпы Флоридада питондардың жыл сайын мал мен үй жануарларына шабуыл жасауы қалыпты құбылыс саналады. Қазір құтқарушылар қолға түскен жыландарды ұйықтату арқылы өлтіріп тастауға көшкен. Мына питон да солардың кебін киюі мүмкін.
