АҚҚҰМДЫҚТАР АТА КӘСІПТІ ҚОЛҒА АЛДЫ
Қазір мал бағамын, жеке шаруашылығымды дамытамын деген жанға мемлекет тарапынан қолдау үлкен. Сондай бағдарламаларды тиімді пайдаланған ауыл тұрғындары төрт түлікті көбейтіп қана қоймай, ет, сүт бағытындағы экологиялық таза өнімді нарыққа молынан шығара бастады. Бұл игі бастаманы қолға алғандардың бірі – Жалағаш ауданы Аққұм ауылының тұрғыны Нұрболат Абдраманов.Нұрболат жастайынан төрт түлікті баптап, мал жайғаудың қыр-сырын жетік меңгеріп өсті. Ауыл азаматы уақыт өте мал басын көбейтіп, оны асылдандыру жайын қарастырып, ойлаған мақсатына мемлекеттік бағдарлама арқылы қол жеткізді.
Аққұм ауылында жайылымдық жер мол болғандықтан мал басын арттыруға мүмкіндік бар екендігін ескерген ол «Жұмыспен қамту – 2020» бағдарламасы арқылы 3 млн теңге несие алды. Бір жақсысы, оның пайыздық үстемесі жеңілдетілген. Несие қаражатына қорасын малға толтырып, ірі қараны асылдандыру бағытындағы жұмыстарды одан әрі ширата түсті.
– «Мал баққанға бітеді» деген ата-бабамыз әу бастан төрт түлікті көбейту жайын жақсы білген. Сондықтан, қазақ даласында тұяқты малдың саны өте көп болды. Міне, қазіргі таңда осы ата кәсіпті қайта жандандыруға барлық мүмкіндік жасалған. Тіпті, тиісті мамандарға барып, кеңес алсаңыз да сізге кәсіп бастаудың қыр-сырын үйретіп, жеңілдетілген несиеге қол жеткізу тетігін көрсетеді.
Тұрғындардың әл-ауқатын көтеруге жәрдемдескен мемлекеттік бағдарламалар арқылы ауылда өз кәсібін бастаушылар көбейіп келеді, – дейді іскер жігіт. Әңгіме барысында Н.Абдраманов бастаған кәсібін одан әрі дамыту жоспарымен де бөлісті.
Ол өткен жылы ауыл іргесінен 75 гектар жер алып, фермер қожалығын құрыпты. Меншігіндегі 58 бас сиырді асылдандыру бағытында еліміздің басқа өңірінен ақбас асыл тұқымды бұқа алдырды. Мал асылданбай өнім молаймайтының білген іскер азамат әлі де ірі қара басын арттыруды көздеп отыр.
Бордақылау бағытындағы жылқылары да жарақты. Оның еті жергілікті тұрғындар мен аудан орталығындағы базарларға үлестіріледі екен.
– Мал жарақты болу үшін қора-жай жылы, азығы құнарлы болуы шарт. Сонда ғана мол өнімге қол жеткізуге мүмкіндік бар. Бір жылқыны 3 ай бағамыз. Нақтырақ айтсақ, балаша күтімді қажет етеді. Оны төрт түліктің ебін білген азаматтар жақсы түсінеді. Қазірзі таңда бордақылау жұмыстарымен қоса, сүт өндіруді де қолға ала бастадық, – дейді кәсіпкер.
Аққұм – аймақтағы тіректі ауылдардың бірі. Мұндағы толымды тірлік көңіл тоғайтады. Қуаныштысы, аққұмдық азаматтар ауылды түлетуге атсалысып, шағын және орта кәсіпкерлікті дамытуды мықтап қолға алыпты. Бұған сапар барысында тағы бір мәрте көз жеткіздік.
Н.ҚАЗБЕКОВ.
Жалағаш ауданы
