ҚЫЗАНАҚ ӨСІРУ – ҚЫП-ҚЫЗЫЛ ЕҢБЕК
Шиелі ауданы Гигант ауылдық округіне барар жолдағы егін алқабына аялдадық. Жеке кәсіпкер Қанат Мұсаевтың егіндік алқабы көздің жауын алады. Бейне бір қызыл-жасыл кілемді жайып жібергендей. Ерте көктемнен егінге қамданған Қанат Мұсаев алдымен 40 мың қызанақ көшетін есік алдындағы жылыжайда өсіріп, дайындап алыпты.
– Жылу, электр жарығымен толық қамтылған жылыжайда өсірілген көшеттерді жерге отырғызбас бұрын күн көзімен жылынған келесі жылыжайдың ішінде 10 күн ұстаймыз. Ауа райына бейімделген көшеттер содан соң барып егіледі, – дейді бұрын агроном болып қызмет атқарған Барлыбай ақсақал.
Әкенің бағыт-бағдарымен кәсіпті қолға алған ол «AgroBaidala» ЖШС 5 млн теңге қаржылай көмек алып, тәуекелге бел байлаған екен.
Биылғы жылы 80 тоннадай өнім жинаған диқан Астана, Ақтөбе, Шымкент қалаларына дейін нарыққа шығып отыр.
– Күтімі мен бабын білеміз. Қызанақ 150 күнде жинауға келеді. Әр түптен 3 келіге жуық өнім алуға болады. Қызанақпен қатар қауын, қарбыз егіп, оны да басқа қалаларға жібереміз. Қазір ынталанған адамға ырыс табудың көзі бар. Тек еңбектену керек, – дейді Қ.Мұсаев.
Қызанақ өсіруді қолға алған тағы бір қарапайым шаруа иесімен жүздесудің сәті түсті. Жексенбай Сарыбалаев бақша дақылдарын өсірумен айналысады. Әсіресе, қызанақ пен қауын – оның диқандық даласындағы басты өнім.
– Сырт көзге жеңіл көрінгенімен, қызанақ өсіру қып-қызыл еңбек. Оған қарағанда картоп өсіру оңайырақ. Көктемде бір миллион теңге несие алып, кірісіп кеттік. 1 гектар қызанақ, 1 гектар қауын, 13 арық қияр егіп, соның ырзығын көріп отырмыз, – дейді егінші.
Жалпы, Шиелі өңірі ежелден диқаншылық дамыған өңір. Мәселен, жыл басынан бері аталған ауданда агросала бойынша 3,1 млрд теңгенің өнімі өндіріліпті. Бұл былтырғы жылдың осы кезеңімен салыстырғанда 4,3 процентке артық.
Осы тамыз айынан бастап шиелілік диқандар көкөніс және бақша өнімдерін Астана, Ақтөбе және Жезқазған секілді қалаларға жөнелтуде.
