15 шілде: Атаулы күндер
1954 жылы Қытайдың Циң хай өлкесінде Алтыншоқы қазақ автономиялық ауданы құрылды.1958 жылы Әбдірасылов Болатбек Серікбайұлы дүниеге келді. Ол Сыр өңірінің тумасы. Қазіргі таңда Болатбек Әбдірасылов ҚР Білім және ғылым министрлігі ғылым комитетінің басшысы қызметін атқарып келеді.
1992 жылы Қазақстан Республикасы мен Румыния арасында дипломатиялық қарым-қатынас орнады.
1997 жылы «Қоршаған ортаны қорғау туралы» Қазақстан Республикасының Заңы қабылданды.
2002 жылы Қазақстан Республикасының «Саяси партиялар туралы» Заңы қабылданды.
2006 жылы Болгарияның Варна қаласында 15-29 шілде аралығында өткен халықаралық балет әртістерінің байқауында ересектер тобында өнер көрсеткен 21 жастағы алматылық Ясауи Мерғалиев бас жүлдені жеңіп алды. 1964 жылдан бері 2 жылда бір рет өткізіліп келе жатқан Варна балет әртістерінің байқауы - өнердің осы саласындағы ең беделді байқаулардың бірі.
2009 жылы Қазақстанда халықаралық Еуро-2 техникалық және экологиялық стандарты енгізілді.
2010 жылы ҚР Тұңғыш Президенті – Елбасы Нұрсұлтан Назарбаев «Кеден одағының кедендік аумағында еркін (арнайы, ерекше) экономикалық аймақтар және еркін кедендік аймақтық кедендік рәсімі мәселелері жөніндегі Келісімді ратификациялау туралы» ҚР Заңына қол қойды.
2010 жылы Брюссельде «Қазақстанның ЕҚЫҰ төрағалығы: нәтижелер мен жаңа белестер» тақырыбында «дөңгелек үстел» өтті. «Дөңгелек үстелдегі» пікірталас кезінде қатысушылар Қазақстанның ЕҚЫҰ-ға төрағалығының тиімді тұстарын және келесі Саммитті Қазақстанда өткізудің маңыздылығын атап өтті.
2011 жылы Нұр-Сұлтан қаласында травматология және ортопедия ҒЗИ жаңа жоғары технологиялық ота жасау ғимараты ашылды.
2013 жылы қазақстандық блогер Бақытжан Бұқарбаевтың «Men Qazaqpyn» жобасының алғашқы шығарылымы жарыққа шықты. «Men Qazaqpyn» жобасы - мемлекеттік тілді еркін меңгерген өзге ұлт өкілдерімен қазақша видеосұхбат.
2015 жылы Вьетнамдағы Абай атындағы мәдениет және ғылым орталығында «100 нақты қадам» ұлт жоспарының тұсауы кесілді.
