Kyzylorda-News.kz

Елбасының «Болашаққа бағдар: рухани жаңғыру» атты мақаласында бүгінгі жаһанданған әлемде өмір сүру үшін бәсекеге қабілеттіліктің аса қажет екені баса айтылады.

Еліміздің ұлттық мәдениеті қалыптаспай, рухани жаңғырудың ойдағыдай, біз аңсағандай болмайтыны белгілі. Қазіргі таңда біздің халқымызға керегінің өзі – осы. Елбасымыз атап өткен прагматизмді қалың жұртшылық енді ғана толықтай түсіне бастаған сияқты. Өйткені ол біздің «төл тарихымызға, балаларымыздың өмір салтына» қатысты екенін тереңнен түсінеміз. Бұл – тарихымыз бен дәстүрімізге, ата салтымызға арқа сүйей отырып, ақыл-ойды кеңейту деген сөз.

Тағы да бір ерекше айтылатын дүние – ұлттық бірегейлікті сақтау. Бұл түсінік – ұлттық сананың көкжиегін заманына қарай кеңейту, дамыту деген сөз. Мақалада салт-санамызда, дәстүрімізде бар дүниелерді бүгінгі жетістіктермен байытып отыру керектігі де сөз болады.

Негізгі тірек – ұлттық тарихымызды, мәдениетімізді, болмысымызды зерттеп, зерделей отырып барынша дамыту. Міне, Елбасымыз осы тектес мәсе¬лелерге тоқталған. Оған қоса, білім саласы туралы да біраз ой айтылған. Әсіресе ұлттық білім беру стандартын түзу жолға бағыттау мәселесі кеңінен қамтылған. Біз білім беру саласында да әртүрлі ірі әлемдік жетістіктерге жетуіміз керек. Басқаларға еліктемей, өзі-міздің дара жолымызды іздестіруіміз қажет. Мақалада халыққа салмақты, сали¬қалы, тереңнен сыр шертер ойлар көп. Мәселен, патриотизмді неден бастау қажеттігі жөнінде: «Патриотизмнің ең жақсы үлгісі – орта мектепте туған жердің тарихын оқудан бастау керек» деп түйіндейді.

Өз өлкесінің тарихын, ата-салтын білмеген, өз мәдениетінің жай-күйіне жаны ашымайтын адам, бүкіл ел тағдырына шын ниетімен қинала қояды дегенге аса сене қоймаймын. Олай болса, тарихи-мәдени мұраға жаны ашу – жас ұрпақты, әрбір саналы азаматты отаншылдыққа, шынайы патриотизм мен гуманизмге баулудың ең тиімді де, ықпалды жолы. Атадан қалған асыл мұраға мұрагер бола білмей тұрып, өз Отаны үшін күресшілдікке, жасампаздыққа қол жеткізу қиын. Рухани мұрамыздың асыл кәусары саналатын мәдени мұрағаттарымыз біздің рухани түлеуімізге соны пәрмен, тегеуірінді қарқын косары сөзсіз.

Міне, осы орайда айтылатын мәселе облыста атқарылып және жоспарланып жатқан жұмыстар аз емес. Жалпы біздің өңірді нағыз рухани мұралардың алтын қазынасына айналған құтты мекен десем артық айтқандық емес. Ұлттық мәдениеттің, оның ішінде сөз өнерінің қай саласын алсаңыз да біздің қасиетті топырақтан түлеп ұшқан біртуар азаматтар жетерлік.

Менің айтайын деп отырғаным, Елбасымыздың осы ұлы бастамасын жүзеге асырудағы облысымыздың тарапынан атқарылып жатқан мәні мен мағынасы зор игілікті істердің барысы. Әсіресе халқымызға ауадай қажет ұлттық санамызды қалыптастыратын ата-бабаларымыздың мұра қылып қалдырған жәдігерлерін жинастырып, қайта жаңғырту.