Kyzylorda-News.kz

Қазалы ауданында ағаш отырғызу акциясы ұйымдастырылды. Қоршаған ортаны көгалдандыруды басты мақсат еткен шара аудан тұрғындары тарапынан үлкен қолдау тапты. Сенбілікке мектеп ұстаздары, балабақша қызметкерлері, студент жастар, теміржол саласының мамандары, дербес бөлім қызметкерлері, дәрігерлер, мемлекеттік қызметкерлер, ардагерлер мен мешіт қызметкерлері белсенді қатысты. Жалпы, бүгін қала, кент, ауылдық округтерде барлығы 25 мың түп ағаш көшеттері егілді. Оның 4300-і түрлі жеміс ағаштары.

Сондай-ақ, биыл Қазалы ауданында жасыл белдеулер орналастыру жұмыстары қолға алынды. Әйтеке би кентінің бас қақпасынан бастап теміржол өткеліне дейінгі аралықтағы 2,6 гектар аумаққа ағаш көшеттері отырғызылуда.

Жасыл белдеуге сыр талы, үйеңкі, қайың, қаратал сынды 8800 дана тал ағаштары егіліп, күтімге алынатын болады. Екпе талдар пластикалық трубамен тамшылатып суарылып, екі жағы тормен қоршалмақ.

Айта кетейік, аудан әкімінің өкімімен жарияланған көктемгі көркейту-көгалдандыру және санитарлық тазалық жұмыстары 11 наурызда басталған болатын. Содан бері аудан көлемінде 6 рет өткізілген сенбілік жұмыстары өз нәтижесін беруде.