Kyzylorda-News.kz

Аймақтық «Рухани жаңғыру» орталығының ұйымдастыруымен Елбасының «Болашаққа бағдар: рухани жаңғыру» бағдарламалық мақаласына жыл толуына орай «Қазақстандағы 100 жаңа есім» жобасының жеңімпазы, аудармашы, педагог-психолог Сымбат Әбдірахманованың қатысуымен коучинг өтті.

 «Табыс кілті – өз қолыңда» тақырыбында өткен шарада Сымбат Әбдірахманова қаржыны қажет етпейтін жобаларды жүзеге асырудың жолдарын айтып, өз тәжірибесімен бөлісті. Балаларды топ-топқа бөліп, бойындағы жақсы қасиеттерді дамытушы тапсырмалар берді. Ойындар ойнатып, сергітіп те алды.

Сонымен қатар, коучке қатысушыларды жігерлендіріп, болашаққа бағдар болар ойын ортаға салды. Оқушылардың қалауы бойынша ағылшын, парсы тілдерінде әңгіме айтып,  қызықтырған сауалдарына жауап берді.  Болашақ жоспарымен бөлісті. Сөз барысында туған жерге деген сүйіспеншілігі мен құрметі ерекше қыз Қызылорда облысының мейрейтойына орай тағы бір туындысын жарыққа шығаратындығын айтты. Ал шараға арнайы шақыртылған қалалық «Мұрагер» мектебінің 10 сынып оқушысы Евгений Демиденко Сымбаттың ізін жалғап, замандастарын уақыттарын тиімді өткізуге шақырды.

Евгений – Оңтүстік Кореяның Дэджон қаласында өткен «Жас ғалым» халықаралық жобалар байқауының жеңімпазы. Ол әлемнің түкпір-түкпірінен жиналған ізденімпаз балалардың ғылым бәйгесінде "Биологиялық процестердің 4D модельдерін әзірлеу" тақырыбында үздік шығып, 1-ші орын иеленген.

  Шара соңында оқушылар озық ойлы жандарға көкейде жүрген сауалдарын қойып, тұщымды жауап алды.