Kyzylorda-News.kz

Елбасы «Болашаққа бағдар: рухани жаңғыру» атты бағдарламалық мақаласында алдағы меже – дамыған 30 елдің қатарына кіру екенін айтқаны мәлім. «Бұл мақсатқа жету үшін біздің санамыз ісімізден озып жүруі, яғни, одан бұрын жаңғырып отыруы тиіс» деп, сана дайын болмаған жағдайда, адам өзі жеткен табысты баянды етіп ұстап тұра алмайтынын атап көрсеткен болатын.

Жақында №58 орта мектете аталған бағдарламалық мақала бойынша «Туған жерге тағзым, мектебіме тағзым» акциясы аясында «Теңізбен тағдырлас» атты кездесу кеші өтті. Кездесудің басты кейіпкері – ұзақ жылдар бойы басшылық қызметте болып, елдегі балық шаруашылығы саласының өсіп-өркендеуіне өз үлесін қосқан жерлесіміз, «Арал ауданының құрметті азаматы», «Республика балық шаруашылығының еңбек сіңірген қызметкері» атағының иегері Әділбек Әйімбетов болды.

Іс-шара бастауыш сынып оқушыларының мерекелік бағдарламасымен ашылды. Ал, жоғары сынып оқушылары үшін Әділбек Әйімбетовтің өмір жолы, қызықты естеліктерінен слайдтар мен бейнероликтер дайындалып, таныстырылды. «Сыр-сұхбат» бөлімінде оқушылардың сұрақтарына жауап беріп, өзінің кейінгі ұрпаққа үлгі боларлықтай өмір тәжірибесімен бөліскен кейіпкеріміз жеткен жетістіктердің артында еселі еңбек жатқандығын баян етті.

Оқушылар әңгімелесу барысында Әділбек ағаның жеткен жетістіктері, өзі жеткен табысты баянды етіп ұстап тұра алуының сыры –оның еңбекқорлығының, білімге деген құштарлығының, туған жерге деген сүйіс- пеншілігінің арқасында екендігіне көз жеткізді.

Кездесуді Мергенсай ауылдық округінің әкімі Марат Құтмамбетов және мектеп директоры Әбдіхамит Имағамбетов қорытындылап, алғыстарын білдірді. Соңында ардагер Әділбек Ізбасарұлы оқушыларға еліміздің тәрбиелі, білімді, нағыз патриот азаматы болуларына, ал мектеп ұжымына шығармашылық табыс тілеп, ризашылығын білдірді.