Kyzylorda-News.kz

Нәзік әйелден асатын ұлы әмірші жоқ! Ол бізге сан алуан бейнеде келіп, ешбір қулық-сұмдықты арланбай қолданып, жүрегіміздің төрінен орын алады. Ол қаласа, бір сәтте бүкіл болмысымызға еніп, жүректі жаулайды. Алайда еш асықпайды, сабырмен күтеді. Ол ер адам құсап соқыр құмарлықтың жетегінде кетпейді. Жорғаны тізгіндеп ұстағандай, сезімін де салмақпен басқара алады. Керек жерінде тізгінді тартады, сезімін іркиді, қаласа – еркіне жібереді. Дарынды қолбасшыға алынбайтын қамал болмайтындай, әйел де қалаған жүректі дір еткізетін қасиетке ие.

Сен жассың, тамырда қаның тулап тұр. Әйел жүрек түкпіріндегі сақтаулы жүрген тұтас махаббатын, бүкіл нәзіктігін, бар мейірімін саған сарқып береді. Атаққұмарсың ба? Онда ол сені билікке қол жеткізетін сүрлеуге түсіреді, атақты олжалаудың даңғыл жолына жетелейді. Қажыдың ба? Шаршадың ба? Әл-қуатың сарқылды ма? Ол саған нәр береді. Басыңды сүйейді. Сүрініп кетіп, құлап қалдың ба? Иығын тосып, қолын созады. Көңіліңді кірбің басса, жұбатып, бүгінгі сүрінгеніңді ертеңгі жеңісіңе ұластырады. Бұның барлығы әйелдің еркіндегі ерен қасиет. Себебі, табиғат-ана әйелдің әр ниетінің адал серіктесі. Нәзік әйел, мейірімді әйел сені қолдап-қолпаштай отырып көбіне тек өзінің құпия мақсатына жетуді ғана көздейді. Ол мақсатқа сенің еш қатысың жоқ. Әйел әлемнің әміршісі. Әйел үшін талай соғыс басталған. Әйел үшін еркек атаулы атқа мінеді. Күш-қуатын көрсетіп, мақтанады. Бәрі де әйелді үлде мен бүлдеге орау үшін. Әйел үшін еркектер ерлік жасап, қылмысқа барады. Әйел үшін атаққа ұмтылып, билікке таласады. Ал әйел болса, жеңістеріңе енжар қарайды да, сенен теріс айналады. Басқаның құшағына құлай салады. Сен оған бұдан бұлай керек емессің. Көзіңе тік қарап, жылы жымияды. Бұл жымиыстың құпиясын бірде-бір ер адам таба алмады. Әйелдің жан түкпірінде нендей сыр жасырғанын ешкім түсіне алмас. Әйелдің сұлулығына жаны сүйсінбеген, көзіне көзі түскенде жүрегі дір етпеген еркек ұлылыққа қол жеткізер еді. Әттең... Әйел болса нәзік жымиып, еркелей ұмтылып, дегеніне жетеді, жеңісін тойлайды. Ал, біздер сол жымиысқа елітіп отырып қалай жеңіліп қалғанымызды сезбей де қаламыз.

Генри Райдер Хаггард

Аударған: Шынар Әбілдә