ОТБАСЫЛЫҚ САЙЫС ӨТТІ
«Қазақстандық салалық мәдениет, спорт, туризм және ақпарат қызметкерлері кәсіподағы» қоғамдық бірлестігі Қызылорда облыстық филиалы және «ТАРЛАН Батырлары» ЖШС-нің ұйымдастыруымен қаламыздағы «Тарлан» дене шынықтыру-сауықтыру кешенінде «Чемпиондар жанұясы» атты спорттық отбасылық эстафета сайысы өтті.Аталған сайысқа облыс мекемелерінен барлығы 6 отбасылық команда қатысты.
Айта кетейік, жарыс «Тарлан» дене шынықтыру-сауықтыру кешенінің 1 жылдық мерекесіне орайластырылды. Оның мақсаты – салауатты өмір салтын қалыптастыру, спортты насихаттау, баланы достық пен патриоттыққа, ұлттық мәдениетке тәрбиелеу және ата-анамен бала арасындағы қарым-қатынасты нығайту.
Сайыс қызықты өтті. Нәтижесінде І-орынды облыстық Жалаңтөс баһадүр атындағы спортта дарынды балаларға арналған мектеп-интернатының «Дзюдоистер» командасы жеңіп алды. Ал Қызылорда қаласының мамандандырылған әкімшілік сотының бас маман-сот отырысының хатшысы Ә.Төлегеннің «Толағай» отбасылық командасы ІІ-орынды иеленді. Келесі жүлделі орынды облыстық тарихи-өлкетану музейінен қатысқан «Сұңқар» командасы алды. Жеңімпаздар мен жүлдегерлерге бағалы сыйлықтар табысталды.
Қызылорда қаласының мамандандырылған әкімшілік сотының баспасөз қызметі
