ҚАЗАЛЫ ҚАЛАСЫ МЕН ӘЙТЕКЕ БИ КЕНТІ АРАЛЫҒЫ ҚОСЫЛАДЫ
Бұл туралы Қазалы ауданының әкімі Мұрат Ергешбаев халық алдындағы қорытынды есептік кездесуінде мәлімдеді.
Нақты кезеңде ауданда 5 жаңа қоныстану аймағы игерілу үстінде. Өткен жылы инфрақұрылыммен қамтамасыз етілген Әйтеке би кенті мен Басықара автожолы бағытындағы 56 гектар жер учаскесінен тұрғын үй салу үшін 200 адамға жер берілді.
- Қазіргі таңда аудан орталығынан 180 және 210 гектар жер учаскелеріне жол салу, электрмен жабдықтау, ауыз сумен қамту, газ жүргізу жұмыстары жүруде. Қазалы қаласы бойынша да көлемі 180 гектар жер учаскесінде салынатын тұрғын үйлерді инфрақұрылыммен қамтамасыз ету жұмыстары басталды, дейді аудан әкімі.
Сонымен қатар, 81 гектар жер учаскесі бойынша да жобасы әзірленіп, қаржыландыруға ұсынылды. Бұл мақсатқа биыл республикалық бюджеттен 761 млн. теңге бөлініп отыр. Осы жұмыстардың нәтижесінде алдағы уақытта 3 мыңға жуық адам тұрғын үй салу үшін жер телімін алатын болады. Алда кент пен қала қосылып, үлкен орталыққа айналмақ.
