Kyzylorda-News.kz

Қазақстан Республикасының Тәуелсіздігі күні қарсаңында Қызылорда қаласы химия-биологиялық бағыттағы Назарбаев Зияткерлік мектебінде мерекелік концерт өтті.

Әдеттегідей шара республикамыздың мемлекеттік егемендігінің жарқын бейнесі - Әнұранды орындаудан басталды. Қолдарын жүрек тұсына қойып, еліне деген сүйіспеншілік құрметін мектеп ұстаздары, оқушылары және ата-аналары осы «салтанатты ән» арқылы жеткізді. Мұнан соң сахна төрінде құс бейнесіндегі оқушы қыздардың орындаған театарландырған қойылымы көрсетілді. Оқушылар қазақ халқының талай ғасырларының куәсі болған алып бәйтерек ағашының тарихын бейнелеуде әрбір бұтағын тарихтың шындығына шыңдалған оқиғалы би қимылдары арқылы көрсетті. Әр бұтағы жұлдыздай жарқыраған жас бәйтерек кенеттен Астана төріндегі алып Бәйтерекке айналып, рухани жаңғыру бейнесіндегі қыранның көк аспанда еркін қалықтауы көрермендерге ерекше әсер сыйлады.

Ұлттық рухты оятып, отаншыл сезімді қалыптастыруға бағытталған шара әрі қарай «Кең далам» биімен және тәуелсіздік, туған жер туралы әндермен жалғасты. Іс-шарада өз өнерін тарту еткен оқушылар Тәуелсіздіктің – олар үшін ең құнды қазына екенін көрсетуге тырысып бақты. Бейбітшіліктің символына айналған ақ көгершіндерді сахна көгіне ұшырып, жас таланттардың орындауындағы өзбек биі тәуелсіз елімізді мекендеген көп ұлттардың бірлігінен көрініс берді.

Сондай-ақ, шара барысында мектеп оқушыларынан құралған вокалды-аспаптар ансамблінің орындауында патриоттық әндер шырқалып, жас ақындардың тәуелсіздік туралы оқыған толғаулары көпшілік көңілінен шықты. Ал мектебіміздің 7,8-сынып оқушыларынан құралған хорда «Аққу елім-Қазақстан» атты әні көрермендер қошеметіне бөленді.

Мерекелік концерт соңында Тәуелсіздік мерекесімен құттықтау үшін сөз алған мектеп директоры Жұматай Бақыт Әмірханұлы егемендік, азаттық секілді ұғымдар әрбір халық үшін қазыналы екенін атап өтті. «Қазіргі таңда біз Тәуелсіз ел болып толағай табыстарға қол жеткізіп жатырмыз. Сол Тәуелсіздіктің бір жемісі - ел бойынша Назарбаев Зияткерлік мектептерінің ашылуы, жастардың сапалы білім алуына және соңғы замануи құралдармен жаңаша әдіс-тәсілдермен жұмыс істеуге мұғалімдер үшін толыққанды жағдай жасалғаны. Келесі кезекте, біз «Мемлекет мен үшін не істей алады? деген ойдан аулақ болып, керісінше «Мен мемлекет үшін не істей аламын?» деген сұрақты көкейімізге түйе жүріп, еліміздің жарқын болашағы үшін терең білім алып, елге қызмет жасауымыз қажет. Елімізді дамыған елдердің қатарына қосу - біздің міндетіміз. Ұлтымыз үшін Ұлы мереке қарсаңында Сіздерге зор денсаулық, отбасыларыңызға амандық, бақ-береке, ырыс-дәулет, ел болашағы үшін жасап жатқан еңбектеріңізге толағай табыстар тілеймін!», - деп, өз сөзін аяқтаған мектеп басшысы өскелең ұрпақ тәрбиелеу жолындағы белсенді еңбегі мен қосқан ерекше үлесі үшін бірқатар мектеп қызметкерлерін және мектепішілік «Қоғамға қызмет» әлеуметтік жобасына қатысып, ерекше белсенділік танытқан оқушыларды Алғыс хатпен марапаттады.

Іс-шара соңын «Тәуелсіздік-тәу етер қасиет, киеміз, бабалардан қалған ақжолтай аманат. Тәуелсіздік- «Мәңгілік ел» болудың бастауы! «Рухани жаңғыру»- Тәуелсіздікті мәңгі ету!» - деп аяқтаған Назарбаев Зияткерлік мектебінің ұжымы жүрегі елім деп соққан қазақстандық әрбір азаматты Қазақстан Республикасының тәуелсіздігіне 26 жыл толған мерейлі мерекесімен шын жүректен құттықтайды!