ГИДРАНТТАР ЖАҒДАЙЫ ТЕКСЕРІЛДІ
Жыл басынан бері облыс көлемінде 227 өрт оқиғасы орын алды. Өрт оқиғасы орын алғанда алғашқы өрт сөндіру құралы су болғандықтан, өрт гидранттарының жағдайы жарамды болғаны маңызды. Қазіргі уақытта Қызылорда облысы бойынша 4225 өрт гидранты және 136 су қоймасы тіркелген. Оның ішінде 843 өрт гидранты және 28 су қоймасы әр түрлі себептермен пайдалануға жарамсыз.
Өрт сөндіру гидранты — өрт сөндіруге арналған су құбырының жүйесіне орнатылған су бөлетін мұнара. Өрт сөндіру гидрантының жер үстіндегі және жер астындағы түрі бар. Олардың жағдайы – елді мекендерді өрттен қорғау саласындағы ең салмақты іс-шаралардың бірі болып табылады. 
Алтыншы маусым күні Қызылорда облысы ТЖД мамандары бұқаралық ақпарат құралдары өкілдерімен біріге отырып, «Өрт сөндіру гидранты» рейдін өткізді. Рейд нәтижесінде көше бойындағы гидранттың жақсы жағдайда екендігі анықталды. Алайда, арнайы қақпағы жоқ, қоқысқа толып қалған гидранттар да кездесті, кейбір өрт сөндіру гидранты тіптен асфальтталып тасталған болып шықты.
Сонымен қатар, тұрғындарға өрт сөндіру гидранттарына қоқыс қалдықтарын тастауға, лас суларды төгуге қатаң тыйым салынатынын ескерте кеткіміз келеді.
Айгүл Нұрманова,
Қызылорда облысы ТЖД
Мемлекеттік тіл және ақпарат тобының
бас маманы
